Categoría: patrimonio


Ugia Pedreira e Marina Oural

Mándanos recado Ugia Pedreira, naveganta ocasional con Dorna, colaboradora da revista e mariñá afincada na Arousa que alá se vai de paseo ás terras bretoas...
Ela e a súa viciña mariñá Marina Oural, levan ao norte un recital músico poético que titularon GALIZIA MUÁ!

Así o contan elas:
La Bretagne (Franza) é o seu primeiro porto, amigo ancestral de cando A Mariña Luguesa e a costa bretona seica se uniron polos ventos alá polo século V e se asentaron nas costas galegas os primeiros bretóns. Por iso agora comezan a súa singradura en barco, transporte natural que uniu estas terras. Van cantar e recitar o que senten sen máis, iniciar unha travesía que ben poidera ser, na historia, de irmás.
Ugia Pedreira accede á a súa voz máis íntimísima e ás súas composicións máis gardadas. Marina Oural atrévese a verse con ela desde as palabras sentidas pola vida e recitará os versos que lle saíron da alma.
Os mundos delas atóparonse nas Altas Terras do Norte, na palabra e na música co sentido tácito que dá um espazo-tempo na aldea, desde unha infancia cruda e riquísima a unha adolescencia soñadora mar por medio.

As actuacións e datas son as seguintes:
- Atelier Charpente de Marine. Philippe Simon. 10 de febreiro de 2012
- Casa Bain-de-Bretagne, Rennes. 11 de febreiro 2012

Navegantes que andastes de encontros polo mundo, alá por Brest e Dourdenez, mandade recado da visita destas artistazas.

E por certo, Ugia voltará a tempo de actuar co seu grupo Marful no Museo da Conserva da Arousa. Será o 14 de Febreiro. Reservade entradas!

Categoría: Rei do Mar



Inda que non teñamos imaxes, a actividade ó redor do Rei do Mar segue o seu curso.

Estase buscando o millor presuposto para os cables dos estais e iso leva o seu tempo. Tamén hai que dicir que a gripe atacou a algún dos nosos e xuntando todo fai que teñamos un parón na actividade esta semana. Mais, estade pendentes dunha ineludible convocatoria

Categoría: persoeiros



Se premedes na imaxe veredes o vídeo recomendado por Anxo Angueira e que completa o que realizou Trepat.




A realización deste vídeo é de Diego Torres, baseada nas películas de Mikael Mörling.



Aurelio, o sogro de Staffan Mörling, navegando na súa dorna, Leonisa, conforma un auténtico poema visual.

Categoría: persoeiros

Tal como viña anunciado no blog da FGCMF, este venres emitiuse na Televisió de Catalunya, dentro dos documentais de Thalassa, un vídeo sobre Staffan Mörling titulado Staffan Mörling, el suec de l´illa d´Ons. Dura 18´.

O vídeo fala da vida de Mörling na illa nos anos 60, acompañándoo coas películas que o seu irmán, Michael, gravou nesa época. As dornas e a vida cotiá están presentes no documental. Pero ademais quérese facer fincapé no vínculo e compromiso de Mörling coa cultura marítima do noso país: os estaleiros de Purro son un exemplo. Durante uns segundos saen imaxes da Nova Marina tripulada por xente da escola.


Se premedes na imaxe poderedes velo.



A realización deste documental é obra de Josep-Antón Trepat